Ekstremna suchota, horce lěćo a skórniki přiwšěm slědy zawostajili
Budyšin/Holešow/Konjecy (SN/BŠe/JaW). W kupnicach, zahrodnistwach, na priwatnych štomowych plantažach abo w swójskim lěsu pytaja ludźo tuchwilu za derje zrosćenym hodownym štomom, kotryž ma lětsa swjedźensku naladu w dobrych stwach přisporjeć. Kaž slědźenski institut Bitcom ze sydłom w Berlinje zdźěli, sej něhdźe 47 procentow ludźi swój štom cyle klasisce pola wikowarja kupi, jědnaće procentow naprašowanych skaza sej jón w interneće, a kóždy štwórty sej swój sam w lěsu podrěza.
„Wichory, skórniki, suchota a horcota w lěću pak su slědy w sakskich lěsach zawostajili. Mnohe małke čerstwe zwosadźene štomiki su wuschnyli. Wjetše eksemplary su ekstremy porno tomu derje přetrali“, wuswětli statny sekretar sakskeho ministerstwa za wobswět a ratarstwo dr. Frank Pfeil spočatk měsaca k zahajenju hodowneje štomoweje sezony.
