Prominentni wo zakónčenju wudobywanja brunicy diskutowali
Smochćicy (SN/BŠe). Wšitcy wědźa, zo njemóže hladajo na změnu klimy dale hić kaž dotal. Wobswět ma so škitać a kóždy móže k tomu přinošować. Resursy dyrbimy zmysłapołnje wužiwać, zo móhli wšitcy na zemi derje žiwi być. To je mjenje abo bóle hłowne wuprajenje sobotu přewjedźeneho Smochčanskeho foruma. Zarjadowanje bě zakónčace zymskeje akademije, na kotrejž zaběrachu so wobdźělnicy minjene dny z wobswětowej encykliku bamža Franciskusa Laudato Si z lěta 2015. W njej namołwja hłowa katolskeje cyrkwje wšitkich ludźi na swěće, zamołwiće z wobswětom wobchadźeć. Hladajo na tuchwilnu diskusiju, zakónčić wudobywanje brunicy we Łužicy, bě tema w Smochćicach derje wolena. Na sobotnu podijowu diskusiju ,,Kohle mit der Kohle“ běchu sej bywšeho sakskeho ministerskeho prezidenta Stanisława Tilicha (CDU), wědomostnikow prof. dr. Markusa Vogta z Mnichowa a prof. Christiana Wilhelma z Lipska kaž tež hłowneho jednaćela pomocneho skutka Misereor Pirmina Spiegela přeprosyli.
