Budyšin (CS/SN). Ličby lubja optimizm: Su-li lěta 2017 z wobłuka Budyskeho wokrjesneho rjemjeslnistwa 31 wučomnikow po połštwórtalětnym wukubłanju wuwjazali, bě jich loni 42 a lětsa samo 47 z powołanskich skupin připrawowy mechanikar, elektronikar a metalotwarc.
Swjedźenska ceremonija wotmě so minjenu sobotu w Budyskim Dźiwadle na hrodźe po tradicionalnym wašnju. Chorhoje zjednoćenstwow na žurlu přinjesši su tam zjednoćenstwowu křinju wočinili. Dołhož je wona wočinjena, njesmě so łžeć a žadyn alkohol pić. Piwo je wuwzaće, wšako maja je za cyrobiznu. Zastupujcy swojich starobnych towaršow smědźachu třo najlěpši wučomnicy lětnika z čestnymi hosćimi składnostnje swojeho wuswobodźenja karančk piwa wupić.
Nimo staršich a wukubłarjow wobdźělichu so na swjatočnosći tež sakski kultusowy minister Christian Piwarz, Budyski krajny rada Michael Harig (wobaj CDU), tudyši wyši měšćanosta Alexander Ahrens (SPD), wokrjesny rjemjeslniski mišter Frank Scholze a dalši.