Wot pjatka ćeče woda do přichodnje najwjetšeho jězora Braniborskeje
Choćebuz (SN/at). Na sewjeru Choćebuza su pjatk oficialnje započeli wuchodny, abo kaž Delnjoserbja praja, Liškowski jězor pjelnić. Jama, kotruž bě w decembrje 2015 zawrjena brunicowa jama Choćebuz-sewjer zawostajiła, ma so po přestrjeni 19 kwadratnych kilometrow najwjetši jězor Braniborskeje stać. To je wodowa płonina połtřeća raza tak wulka kaž Berlinski Wulki Müggelowy jězor.
W delnjołužiskej metropoli so na wulke wočerstwjenišćo wjesela. Klimowi aktiwisća projekt kritisce wobhladuja. Krótko do spektakla z wulkej laserowej show nad arealom jamy je krajny zarjad za hórnistwo, geologiju a surowizny dowolnosć za pjelnjenje jězora přepodał.
