Hory (SN/SiR). Wuhladnišćo na Horach w gmejnje Halštrowska Hola je domoródnym kaž cuzym fotografam woblubowane zetkanišćo a wobkedźbowanišćo. Tež filmytwórcy a přećeljo přirody su tam hižo rjane wideja a wobrazy zapopadnyli. Kolesowarjo a pućowarjo tam runje tak rady pozastawaja.

Z drjewjaneho pawiljona maš rjany wuhlad na Horjanski jězor. W aprylu 2008 su wuhladnišćo přepodali. Zwjetša je tam wšitko čiste a porjadnje zawostajene. Wo wotstronjenje wotpadkow stara so gmejna Halštrowska Hola.

W minjenych tydźenjach so wobraz wuhladnišća trochu změni. Tak připrawichu tam nowy płót, zo móhli wopytowarjow lěpje wodźić. Móžno bě to dźakowano crowdfundingowej akcije Wuchodosakskeje lutowarnje Drježdźany, z kotrejž su podpěraćeljo naprawy wjac hač 4 000 eurow nazběrali. Nasypana bu před wuhladnišćom nětko wosebita měšeńca kamuškow, kotrež chcedźa za nowy pućik wužiwać. „Zdobom je hišće dalši škitny płót předwidźany, zo móža pawiljon jenož hišće pěšcy abo ludźo z jězbnym stołom wužiwać“, rozłožuje nawoda při­rodoškitneho projekta Łužiska jězorina dr. Alexander Harter.