Łužiske wodźizny nimaja wody dosć
Budyšin (SN/BŠe). Mjez Choćebuzom a Budyšinom nastawa tuchwilu najwjetša kumštna jězorina. Po cyłym regionje pak njeje wody dosć, znajmjeńša w lěću nic. Hižo loni bě połoženje chětro napjate, tež lětsa wjele hinak njewupada.
Kaž koncern Łužiska energija a milinarnje (LEAG) zawčerawšim zdźěli, njebudu přichodnje žanu wodu ze Sprjewje brać, zo móhli jězor na sewjeru Choćebuza zapławić. Přičina je trajaca suchota. Něhdźe 80 procentow wody za 19 kwadratnych kilometrow wulki jězor ma ze Sprjewje přińć. Kaž rěčnica LEAG wuswětli, běchu suche periody do wobličenjow hižo sobu zapřijeli. Hač do lěta 2024 ma jězor tuž po planje zapławjeny być. Hdy budu wodu zaso ze Sprjewje brać móc, hišće jasne njeje. Nanajpozdźišo nazymu pak ma woda zaso z łužiskeje rěki do jězora ćec. Choćebuska wobswětowa skupina Zelena liga postupowanje kritizuje. Hladajo na wulku płoninu jězora a hoberske wuparjenje to wodowu bilancu wobćežuje. Mjeńši a hłubši jězor na tym městnje by problem trochu pomjeńšił.