Budyšin (SN/BŠe). Najebać wulku suchotu w lěću a dale wupřestrěwace so škódniki w lěsach budźe lětsa dosć hodownych štomikow k dispoziciji, wobkrući tele dny sakski ratarski minister Thomas Schmidt (CDU) k zahajenju lětušeje sezony. „Nichtó njetrjeba so hodowneho štomika wzdać abo sej hladajo na škit lěsa plastikowy štom kupić.“
Za mnohe swójby je jedyn z dohodownych wjerškow, sej swój štomik wuzwolić. W Konjecach předawa lětsa znowa Šołćic swójba hodowne štomy, kotrež na swójskej ležownosći plahuja. „Lětsa drje su suchoty dla chětro ćerpjeli. Za kupcow pak mamy dosć na wuběr a móža sej je sami wuzwolić“, Regina Šołćina přilubja.
Kaž lěsni fachowcy zdźěleja, je suchota wosebje žiwjensku móc štomow wobwliwowała. Předewšěm nalěto sadźane su potrjechene, wšako nimaja hišće dosć do hłubokosće sahacych korjenjow. W lěću je něhdźe 50 procentow sadźenkow zahinyło. Starše štomy su suchotu lěpje přetrali. Najwjac z nich je wosom do dwanaće lět rostło, zo maja nětko prawu wulkosć hodowneho štomika.
