Turistiski zwjazk Łužiska jězorina chce nowym projektam pomhać
Zły Komorow (SN/JaW). Łužiska jězorina so tuchwilu wuwiwa kaž nimale žadyn druhi region w Němskej. Bě-li krajina wčera hišće wudobywanišćo brunicy, nańdźeš dźensa hižo na mnohich městnach wódny paradiz. Turizm tele wuwiće jara pohonja. Trěbne pak su za to čerstwe ideje, zmužitosć, wunamakanski duch a inowaciska móc. Runje za tajkimi turistiski zwjazk Łužiska jězorina pyta a je projekt pod hesłom „Rjekojo turizma łužiskeje jězoriny“ do žiwjenja zwołał. Z nim rozhladuje so za nowymi mysličkami a produktami za turistisku branšu w regionje. „Přeprošamy wšitkich, změnu aktiwnje sobu wuhotować, a wjeselimy so na njewšědne, inowatiwne a kreatiwne ideje“, zdźěla jednaćelka turistiskeho zwjazka Łužiska jězorina Kathrin Winkler.
