Drježdźany/Budyšin (SN/JaW). Regionalny bliskowobchad wostanje dale zaručeny. Wo tym informujetej wobchadny zwjazk Hornje Łobjo (VVO) a zaměrowy wobchadny zwjazk Hornja Łužica-Delnja Šleska (ZVON). „Tež hdyž su šule corona-pandemije dla wot srjedy zawrjene, płaći hač do kónca tydźenja regularny jězbny plan. Wot póndźele, 23. měrca, jězdźa naše busy po prózdninskim jězbnym planje. Wo dalšich změnach sčasom informujemy“, zdźěli nowinski rěčnik VVO Christian Schlemper. Jězbne plany su tež na internetnej stronje wobchadneho zwjazka www.vvo-online.de přistupne.