Serbscy ratarjo su ječmjeń hižo dožnjeli a nadźijeja so dale dobreho wjedra
Róžant/Miłoćicy/Koćina (SN/JaW). Serbscy a hornjołužiscy burja liča z dobrym wunoškom žnjow. To zamołwići wjacorych ratarskich zawodow na naprašowanje Serbskich Nowin wobkrućichu.
Róžeńčanska agrarna AG Sorabia je na 176 hektarach nazymski ječmjeń dožnjała, zdźěli jednaćel Matej Korjeńk. Nastupajo wunošk pak hišće prognozu nima. „Přerězk ječmjenja minjenych lět bě něhdźe 74 decitonow, štož lětsa cyle wěsće znowa docpějemy. Kwalita zorna je dobra, nastupajo wunoški smy w dobrym přerězku. Njemóžemy tuž skoržić.“ Po informacijach Korjeńka njemóžachu tam někotre dny žnjeć, dokelž njebě zorno hišće zrałe dosć. Wot póndźele pak zaso młóća, mjeztym tež triticale. Ručež su z tym hotowe, pojědu do rožki, kaž Korjeńk připowědźi. A hdyž wjedro wudźerži, chcedźa kónc tydźenja započeć rěpik žnjeć.
