W zymje a z „wohrěwanskimi hribami“ w stanje swjećić wupuć njeje
Hórki/Hrubjelčicy (SN/mwe). Zo so druha žołma koronoweje krizy nazymu na nas wali, před tym běchu wirologojo a druzy eksperća dawno hižo warnowali. Přiwšěm pak mnozy to po zdaću přechutnje brali njejsu a tuž su dźensa wosebje swójby w Radworju, Sulšecach, Ralbicach a dalšich kónčinach w karantenje. Nichtó dokładnje rjec njemóže, kak so wirus pola kóždeho inficěrowaneho na ćěło wuskutkuje. Wosebje potrjecheni su wot přeco znowa aktualizowanych zakazow, wobmjezowanjow a krućišich postajenjow hosćencarjo, mějićeljo hotelow a pensijow a wosebje swobodnje skutkowacy wuměłcy a wšitcy, kotřiž maja z tutej branšu něšto činić.
