Někotři hosćencarjo su na dalšu krizu přihotowani, mnozy pak trjebaja pomoc. Dalši su zašłe měsacy ideje wuwili, kak móhli mjeztym druhi lockdown w gastronomiji přetrać.
Bóšicy/Radwor/Budyšin (SN/BŠe/MiR). Zwjazkowe knježerstwo a zwjazkowe kraje su daloko sahace naprawy wobzamknyli, zo móhli ličby infekcijow z koronawirusom pomjeńšić. Wot póndźele su hosćency znowa zawrjene. Tež pjekarjam, konditarjam a rěznikam w Sakskej je zakazane swoje kofejownje abo přikuskowe předawanišća z městnami wobhospodarjeć. Kupcy smědźa sej jědźe jenož hišće wotewzać. Drježdźanska rjemjeslniska komora je so w mjenje potrjechenych zjawnje wuprajiła a ma postupowanje zwjazkoweho knježerstwa a swobodneho stata za razne zapřimnjenje do swobodneho hospodarstwa. Wězo ma so hladajo na wuwiće nowonatyknjenjow z koronawirusom reagować. Tola jednostronske rozsudy njejsu zmysłapołne.
