Dźěl přibrjoha so do Hórnikečanskeho jězora sunył
Wulke Ždźary (SN/BŠe). Při tuchwilu za ludźi njepřistupnym Hórnikečanskim jězoru je so wčera dopołdnja wulki dźěl přibrjoha do jězora sunył. Potrjecheny je něhdźe 400 do 500 metrow dołhi dźěl wuchodneho přibrjoha mjez Koblicami a sydlišćom do směra na Hórnikecy, sahacy hač do 200 metrow daloko do krajiny. Dźěl lěsa je so tohorunja do jězora sunył. Nimo toho wuskutkowa zesunjenje něhdźe 1,50 metrow wysoku žołmu, kotraž je na napřemo ležacym přibrjohu we Wulkich Ždźarach wulku škodu zawiniła. Potrjechene su dwaj priwatnej bungalowaj a twarjenje płachtakoweho towarstwa Němskeje wuchowanskeje słužby.
