Milinowe předewzaće LEAG so do přichoda zaměrnje wusměrja

Choćebuz (SN/BŠe). Předewzaće Łužiska energija a milinarnje (LEAG) wusměrja so dale na přichod, hdyž njebudźe za produkciju miliny hižo brunica k dispoziciji. Nětko je koncern ze sydłom w Choćebuzu dalše wětrniki kupił a wotpo­wěd­ne dodawanske zrěčenje podpisał, kaž LEAG informuje. Twarski nadawk dósta firma GE Renewable Energy. Jeje němska wotnožka ma swoje sydło w delnjosakskim Salzbergenje, hdźež maja mjeztym wjele nazhonjenjow z wobnowjomnymi energijemi. Tak su hižo wětrnikowe připrawy w Němskej, Francoskej, Chinje, Indi­skej, Brazilskej a samo hižo w USA twarili. Zaměrnje dźěłaja přistajeni na nowych technologijach.

Nětko chce tež LEAG z nazhonjenjow předewzaća GE Renewable Energy profitować a je dohromady połsta wětrnikow skazała. Nadawk je dźěl wobšěrnišeho paketa, kotryž chcedźa na wuchodźe Němskeje, mjez druhim tež we Łužicy, zwoprawdźić. Jedyn z prěnich projektow je wětrnikowy park Baršć-Rjasnik II (Briesnig) z cyłkownje 17 hač do 250 metrow wysokimi wětrnikami.