Choćebuz (SN/BŠe). Wobswětowy zwjazk Zelena liga w Braniborskej a priwatni wobsedźerjo ležownosćow sej wot hórniskich zarjadow žadaja, zo so w padźe njewužiwanja hižo wotkryteje brunicy tamne wuhlowe jamy pomjeńša. Pozadk toho je, zo předewzaće Łužiska energija a milinarnje (LEAG) wuhlo w Janšojskej jamje dospołnje njewudobywa, ale je tam zdźěla ležo wostaji. „Njeje móžno, zo LEAG brunicu na swojich ležownosćach wostaji, dalšim wobsedźerjam pódy pak z wuswojenjom hrozy. Hórniske zarjady měli na městnje zakročić, dokelž je tajke rubježne wudobywanje zakazane. Je-li mjenje brunicy trěbne, měli wotpowědnje mjenje do přirody a priwatneho wobsydstwa zapřimnyć“, wuswětla prawiznik dr. Philipp Schulte.
Zelena liga wotnaja před Wochožanskej brunicowej jamu lěs, kotryž nochcedźa wobsedźerjo energijowemu předewzaću předać. Listej Sakskemu wyšemu hórniskemu zarjadej w Freibergu su so dalši wobsedźerjo ležownosćow přizamknyli.
