Knježerstwo dyrbjało prawidło 3G nastupajo na praktikabelnosć dźiwać

Budyšin (SN/BŠe). Štwórta žołma korony ma nas tuchwilu w horšći, wosebje tež w Sakskej a Braniborskej. Incidency su dale wysoke, a tak płaći tež na dźěłowym městnje postajenje 3G – šćěpjeni, wotchorjeni, negatiwnje testowani. W běhu jenož něšto mało dnjow dyrbjachu firmy, zarjady a institucije – potajkim wšudźe tam, hdźež ludźo na dźěło chodźa – wot 25. nowembra naprawy škita před infekcijemi přesadźić. Dźěłodawarjo stejachu před wulkimi wužadanjemi, wosebje hlada­jo na datowy škit w zwisku ze šćěpjenskim statusom a postupowanje testowanskich móžnosćow. Winowatosć za kontrolu a dokumentaciju maja mjenujcy dźěłodawarjo.