Wažnej dźěłodawarjej brunicoweho regiona wusko hromadźe dźěłatej
Choćebuz (SN/BŠe). Strukturna změna budźe předewšěm předewzaća a jich sobudźěłaćerjow, kotřiž su wot wudobywanja brunicy wotwisni, poćežować. Najwjetši dźěłodawar tohole wobłuka je bjezdwěla koncern Łužiska energija a milinarnje (LEAG). Nětko pak maja tamniši přistajeni perspektiwu do přichoda. Z rozšěrjenjom stejnišća Němskeje železnicy (DB) w delnjołužiskej metropoli, kotrež chce přichodne lěta wjacore dźěłowe městna wutworić, wobsteji nětko wěsta garantija. Minjenu wutoru je jědnaće bywšich wučomnikow LEAG w modernej Choćebuskej wuporjedźerni ćahow DB nowe dźěło zahajiło. Woni wuspěšnje swoje wukubłanje jako industrijny mechanikar, mechatronikar abo elektronikar zakónčichu a budu wot lěta 2024 za hladanje spěšnikow ICE zamołwite. Nětko pak so na nowy nadawk přihotuja a kwalifikuja. Kaž Němska železnica dale zdźěli ma lětsahišće 80 dalšich přistajenych LEAG k nowemu dźěłodawarjej w Choćebuzu měnić.
