Wjelk ze třomi nohami so dale wokoło Chrósćic pohibuje. Mjeztym ma wowčer Gerat Šmit awtomatisku kameru při wowčerni instalowanu, wšako je so ­rubježne zwěrjo tež tam zjewiło.

Časecy (SN/BŠe). Powołanski wowčer Gerat Šmit starosća so dale swojich wowcow dla, dokelž je třinohaty wjelk stajnje hišće we wokolinje po puću. Minjenu srjedu je wón rubježne zwěrjo před Chrósćicami přijěwši ze směra Hórkow wuhladał. Pokazku je hnydom zamołwitemu sakskemu wjelčemu managementej přizjewił. „Jako jedyn z poslednich sakskich powołanskich wowčerjow sym za derjeměće mojich zwěrjatow zamołwity“, wón wuzběhny. Hakle tydźeń do jutrow je Gerat Šmit wjelka na ležownosći wowčernje w Časecach wuhladał. (SN rozprawjachu). W tym času běše wowčernja połna zwěrjatow, wšako je so w januarje zaso wjele jehnjatkow narodźiło.