17. raz skedźbnjeja w sprjewinym měsće na wosebity wudźěłk

Budyšin (SN/MWj). Wot jutřišeho steji město Budyšin štyri tydźenje cyle w znamjenju žonopa. Hač do 4. septembra wotměja so tu mjeztym hižo 17. raz žonopowe tydźenje. Z nimi njeskedźbnjeja jenož na wosebity wudźěłk, kotryž w měšćanskim dźělu Mały Wjelkow produkuja, ale wabja zajimcow předewšěm do hosćencow, kofejownjow a barow, hdźež maja najwšelakoriše kreacije w poskitku.

Lubowarjo Budyskeho žonopa smědźa so na kreatiwne překwapjenki wjeselić. Na jědźnych kartach w hosćencach poskićuja nětko wótre poliwki, žonopowe cocktaile, serbske žonopowe kreacije, wosebite nuklace pječene, słódne steaki a trochu změnjene tradicionalne jědźe. Dohromady 14 hosćencow so na žonopowych tydźenjach wobdźěli, mjez druhim „Culinarium“ na Wulkej Bratrowskej, „Wjelbik“ na Žitnej a „Zum Haseneck“ na Pchalekowej. Wšudźe su rozmyslowali, kak móhli swoje jědźe ze žonopom hišće polěpšić abo što hodźało so noweho na talerju poskićeć. Prěni raz móža hosćo žonopowych tydźenjow ­lětsa swój najlubši poskitk pomjenować a při tym něšto dobyć.