Kamjenska syć „3D-Aero“ chce transport tworow z elektrotrutami bjez wobsadki we Łužicy zadomić. Sakski hospodarski minister Martin Dulig (SPD) je nětko tež na lětanišću Lessingoweho města přebywał.
Kamjenc (IF/SN). Wysoki wopyt su na syći „3D-Aero“ wobdźěleni wčera na Kamjenskim lětanišću witali. We wobłuku swojeje „Hospodarskeje tury 2022“ je sakski hospodarski minister Martin Dulig (SPD) tam přebywał. Tři dny je minister po puću a informuje so w předewzaćach w Drježdźanach, we wuchodnej Sakskej a w Kamjenskim rumje.
Wopyty maja pokazać, z kotrymi faktorami stanu so wuzwolene firmy z pućrubarjemi swojeje branše a kotre iniciatiwy woprawdźity potencial na wikach lubja. Za to su tónkróć wotpohladnje skerje njeznate předewzaća a industrijne syće wuzwolili. W dźěłowym titlu bě tuž rěč wo „ćichich stawizničkach wuspěcha“.
