Lětsa bě plahowanje rybow łužiskim hatarjam wulke wužadanje

Budyšin (SN). Lěto 2022 njebě jednore lěto za hornjołužiskich rybarjow. Horce temperatury a pobrachowacy dešć plahowanje rybow chětro wohrožowachu. Tola přiwšěm smědźa so nazymu w regionje na słódne chłóšćenki wjeselić.

Sobudźěłaćer Malešanskeje wotnožki Chrjebjanskeje rybarskeje tzwr Silvio Barz je mjez druhim zamołwity za Hućinjansku skupinu hatow. Předewzaće wobhospodarja cyłkownje wjace hač 800 hektarow hatneje přestrjenje we wokrjesomaj Budyšin a Zhorjelc. W Hućinjanskich hatach je Barz połoženje lětsa cyle dokładnje wobkedźbował. Mjeztym su haty zaso derje z wodu pjelnjene. Jich normalna hłubokosć je 80 centimetrow hač do jednoho metra. „W horcych, suchich tydźenjach woda wo dobru połojcu spadnje.“ Najebać jeho dołholětne skutkowanje jako hatar bě to jemu lětsa nowy wobraz. „Naša firma je prěni raz woprawdźe přemyslowała, w někotrych hatach ryby nuzowje wułójić.“ Potom dyrbjeli karpy spěšnje z wody a na druhe městno, dokelž by suchoty dla přemało kislika we wodźe było.