Twornja TDDK w Nadróznej Hrabowce před nowymi nadawkami

Nadrózna Hrabowka (SN). Japanski dodawar awtomobilnych dźělow TDDK z Nadrózneje Hrabowki, měšćanskeho dźěla Njedźichowa, wostanje we Łužicy a je wčera přetwar zawoda připowědźił. Tak chce so k najwjetšemu produkciskemu zawodej elektriskich klimowych kompresorow za wosobowe awta w Europje wuwić.

Sakski ministerski prezident Michael Kretschmer (CDU) je wčera jednaćela TDDK Yoichia Teraoa w statnej kencliji witał. Mjez přitomnymi běše tež nowy Budyski krajny rada Udo Wićaz (CDU), Njedźichowski měšćanosta Harry Habel (CDU) a nawoda Sakskeje agentury za strukturne wuwiće (SAS) Jörg Mühlberg. „Wjeselu so jara, zo TDDK dale we Łužicy inwestuje. Produkcija elektriskich klimowych kompresorow je wažny rozsud za přichod stejnišća w Njedźichowje a jasne wuznaće k elektromobiliće. Wutwar zawoda zesylnja awtomobilitu w Sakskej a je hódnotna podpěra nastupajo strukturnu změnu“, Michael Kretschmer podšmórny.