Budyšin (CS/SN). Wobchad na kolijach ma přichod. Tola z přesadźenjom w Hornjej Łužicy hišće mócnje klaca. Wo tym su wšelacy rěčnicy na mejskim swjedźenju DGB w Budyšinje skoržili. Budyski wyši měšćanosta Karsten Vogt (CDU) rjekny, zo je nimo wutwara awtodróhi A 4 wažne, zo so wyši měšćanosća a krajnaj radaj z Hornjeje Łužicy za elektrifikaciju železniskeje čary Drježdźany–Zhorjelc hromadźe zasadźuja. 8. meje budźetaj wón a Budyski krajny rada Udo Wićaz (CDU) z hosćom pola statneho sekretara, zo byštaj na prekerne wobchadne połoženje w regionje skedźbniłoj.
Je wažne, zo dźěłowe městna pola Alstoma wobchowaja. K tomu wuwjedźe tamniši zawodny radźićel Frank Albert, zo su sobudźěłaćerjo wotzamknjene tarifowe zrěčenje přichoda zuby křipjo přiwzali. Tam bu dowolowy pjenjez šmórnjeny. Woni so nětko nadźijeja, zo móža sej tule stratu ze stopnjowanej efektiwitu wróćo zdobyć. Tarifowe zrěčenje je znajmjeńša hač do 2025/2026 nošne. Zdobom ma Frank Albert za njezmysł, zo njemóža w zawodźe twarjene wozydła jón falowaceje elektrifikacije železniskeje čary dla samostatnje wopušćić.
