W TDDK prěni sympozij „Serbšćina w hospodarstwje“ wotměli

Nadrózna Hrabowka (SN/mb). Započało je so wšo z wuprajenjom němskeho sobudźěłaćerja, zo měło so w rumnosćach za přestawku němsce rěčeć a nic serbsce. To běše zamołwitym nastork, so na kampani „Sorbisch? Na klar.“ wobdźělić a naprawy za runostajenje serbskich dźěławych zeskutkownić. We wulkotworni TDDK, kotraž produkuje jadro klimatizacije za awta, je tuchwilu 950 ludźi přistajenych, mjez nimi někak 40 Serbow. Zo je předewzaće we wobsydstwje japanskeju koncernow mjeztym kaž swětłownja serbšćiny w hospodarstwje, ma wjele z wiceprezidentom industrijneho stejnišća na teritoriju města Njedźichowa činić: Ronald Juhnke njechodźi jenož sam na kurs serbšćiny, ale so za žiwu wjacerěčnosć na dźěle hori. Přeprošenje na prěni sympozij „Serbšćina w hospodar­stwje“ zašły pjatk běše dalši wjeršk jeho rěčneje politiki po dwurěčnym wudaću zawodneho časopisa za sobudźěłaćerjow, poskitku serbskorěčneho wodźenja po firmje a instalowanju społnomócnjeneje za serbske naležnosće.