Pančicy-Kukow/Ljubljana (SN/MiR). Tutón kónc tydźenja steji za 1. serbsku kulturnu brigadu cyle w znamjenju njewšědneho jubileja. Klóšter „Marijina hwězda“ w Pančicach-Kukowje woswjeći z wulkim swjedźenjom 775. lět prěnjeho naspomnjenja. Wuměłske ćěleso Serbskeho gymnazija chce sobotu wječor wopytowarjow klóšterskeje cyrkwje z koncertom zawjeselić. Dźen na to wobrubi skupina brigadnikow dopołdniše kemše z Drježdźansko-Mišnjanskim biskopom Heinrichom Timmereversom.

Póndźelu pojědźe wjace hač 70 čłonow brigady na wuprawu do słowjenskeje stolicy Ljubljany. Tež tam chcedźa spěwarki a spěwarjo wopytowarjow koncerta z twórbami kaž „Tule statok zboža stajić“ Jurja Pilka, „Locus iste“ Antona Brucknera a tež z načasnymi twórbami komponistow, kaž tymi Měrćina Weclicha, překwapić. Koncert zakónčacej titulej budźetej „Dona nobis pacem“ a „Jandźel knjeza“.