W Błótach starosćeja so pasmow dźiwizny a pobrachowaceje wody dla

Błóta (SN/BŠe). W Delnjej Łužicy wojuje wobydlerska iniciatiwa „Błóta město dźiwizny“ wo zachowanje kulturneje kónčiny. Pozadk toho je, zo ma kóždy zwjazkowy kraj Němskeje dwaj procentaj swojeje płoniny za wosebite přirodoškitne pasmo wupokazać. Po planach braniborskeho krajneho knježerstwa měli so za to mjez druhim hižo wobstejace pasma w Błótach rozšěrić. Hižo loni 24. awgusta je so wobydlerska iniciatiwa wutworiła, w kotrejž so mjez druhim wudźerjo, turistikarjo, ratarjo a hajnicy angažuja. „Připadnje wo planach zhonichmy a so bliže z nimi zaběrachmy“, rozjasni čłon iniciatiwy Falkner Schwarz. Błóta su kulturna krajina, kotraž ma so zachować. Akterojo na městnje so starosćeja, jelizo ludźo groble a hrjebje njehladaja. Potom wobsteji móžnosć, zo na přikład powalene štomy wodźizny zatykaja a z tym k přepławjenjam w Błótach dóńdźe. Zwjazkowy zarjad za přirodoškit wšak wopisuje tajku dźiwiznu jako wulke kónčiny, do kotrychž procesow njesměš zapřimnyć.