Krajnaj radaj chcetaj z wjesnjanostami zhromadnje rozrisanje nańć

Budyšin (SN/BŠe). Wutwar zwjazkoweje awtodróhi A 4 a elektrifikacija železniskeje čary mjez Drježdźanami a Zhorjelcom so dale dliji. Wobě naprawje pak stej za dalše hospodarske wuwiće Hornjeje Łužicy njeparujomnej. Derje wutwarjene wobchadne puće su přičina toho, zo so předewzaća w kónčinje zaměstnja abo zawody do swojeho stejnišća inwestuja. „Smój zludani hladajo na wozjewjenje zwjazkoweho knježerstwa ze 7. februara, při čimž nochce Zwjazk dalše wotrězki železniskich čarow w Swobodnym staće elektrifikować“, zdźělištaj krajny rada Budyskeho wokrjesa Udo Wićaz (CDU) a jeho Zhorjelski hamtski kolega dr. Stephan Meyer (CDU).