Spočatk februara je Domowina zjawnosć namołwjała, prašenja za wólbne kopolaki namjetować. Dźensa dokumentujemy wotmołwy stron na prašeni třěšneho zwjazka. Kompletne wotmołwy we wosom politiskich wobłukach je Domowina zjawnosći tež internetnje spřistupniła.

Wuske zhromadne dźěło ze wšěmi frakcijemi krajneho sejma, kotrež so k swobodnemu demokratiskemu zakładnemu porjadej wuznawaja, je nam Serbam wažne.

Kak wobhladujeće zhromadne dźěło z Domowinu, třěšnym zwjazkom a zastupjerku zajimow Serbow po § 5 sakskeho Serbskeho zakonja?

SPD

Z dobrym zhromadnym dźěłom z Domowinu na bazy dowěry chcemy pokročować. W přichodnej legislaturje chcemy zhromadnje ze serbskim ludom Serbski zakoń a Załožbu za serbski lud reformować, tež hladajo na prawo samopostajowanja a soburěčenja.

CDU

Zhromadne dźěło krajneho sejma a wšěch frakcijow z Domowinu wuraznje witamy a chcemy tež přichodnu legislaturnu periodu dźěl tutoho procesa być.