Hišće lětsa w nazymje zahaja zamołwići prěnje naprawy za wutwar zwjazkoweje dróhi B156 mjez Zdźěrju a Čelchowom. Dalši wotrězk dróhi mjez Budyšinom a Zdźěrju pak ma so hišće dale planować.

Zdźěr/Delnja Hórka (UM/SN). Wutwar zwjazkoweje dróhi B156 mjez Wulkodubrawskimaj wjesnymaj dźělomaj Zdźěr a Čelchow zahaja akterojo klětu w nalěću. To je krajny zarjad za dróhi a wobchad (Lasuv) na naprašowanje zdźělił. Tuchwilu rozdźěla zamołwići nadawki za přihot twarskich naprawow. Tak maja so štomy wotstronić a dźěl twarjenja w Zdźěri zwottorhać. Naprawy dyrbja dźěłaćerjo w běhu štyrjoch tydźenjow zdokonjeć. Dróha za wobchad rjaduje so přez jednu jězdnju. Poćeženja za wobydlerjow nimaja wulke być, tole je tež we wotpowědnych wupisanjach naspomnjene. Zajězd do Klukša ze zwjazkoweje dróhi dyrbja twarske firmy zaručić. Dźěła startuja prawdźepodobnje hižo w druhim nowemberskim tydźenju a traja hač dosrjedź decembra. To pak je wot wotběha a wuslědka wupisanjow wotwisne.