Slědźerski centrum za twarske maćizny lětsa drje hižo njezałoža

Budyšin (SN/BŠe). Plany za slědźerski centrum twarskich maćiznow „Living Art of Building“ (LAB), kotryž měješe w Budyšinje nastać, so dale dlija. Poprawom bě předwidźane, centrum lětsa załožić. Tola stało so tole njeje. Město toho je Zwjazk rozsud wo projekće na klětu přestorčił. Pječa ma zwjazkowy sejm wo stejnišću hišće raz znowa diskutować. Zwjazkowe knježerstwo tohorunja wobkrući, zo njeje so zrěčenje z poradźowanskej towaršnosću, kotraž ma załoženje podpěrać, hišće podpisało. Załoženje tajkeho instituta njeje po słowach wuběrka za bydlenje, měšćanske wuwiće, twarstwo a komuny cyle jednore. Tak su rozdźělne předstawy wo prawniskej formje noweho instituta. Knježerstwo pak je zwólniwe, projekt zwoprawdźić.