We Wojerowskim klinikumje mjeztym 15 fachowcow z Brazilskeje dźěłaja

Wojerecy (AK/SN). Mediciniska powołanska fachowa šula Wojerowskeho klinikuma Łužiskeje jězoriny swoju wukubłansku kapacitu wot 25 na 50 městnow wob lětnik podwoji. Z tym stupa cyłkowna kapacita wot dotal 75 na přichodnje 150 městnow. W awgusće šula do nowych rumnosćow přećehnje. Wone su w Kinajchće w prjedawšim ličenskim centrumje. Šulerjo tam powołanje fachowca za hladanje nawuknu w dwěmaj rjadownjomaj wob lětnik. Tole jednaćelka klinikuma Juliane Kirfe minjeny štwórtk na rozmołwje z nowinarjemi wuswětli.

Dale a sylnišo chce chorownja swójski dorost wukubłać. Šulerjo a wučerjo so na přećah hižo wjesela. Rumnosće w Kinajchće chcedźa modernje z tabletami a digitalnymi taflemi wuhotować. Po přećahu maja so wuknjenske wuměnjenja jasnje polěpšić. „Wothłós za powołansku fachowu šulu je tuchwilu jara dobry. Šulerjo pochadźeja z ruma Wojerec, Kamjenca, Kinsporka, Běłeje Wody a Złeho Komorowa.“