Prěni cyłoněmski warnowanski dźeń hospodarstwa dźensa přewjedli

Budyšin (SN/BŠe). Něhdźe 100 hospodarskich zwjazkow a iniciatiwow předewzaćelow z cyłeje Němskeje je dźensa prěni warnowanski dźeń hospodarstwa přewjedło. Tež Budyski zwjazk srjedźneho stawa BVMW skedźbnješe na dramatiske połoženje hospodarstwa. „Dopokaz toho je prěni warnowanski dźeń hospodarstwa, při čimž so předewzaća – zdźěla konkurenća – zhromadnje za změny zasadźeja“, wottam rěka. Team BVMW z Budyšina podpěra žadanja zwjazkow a iniciatiwow. Hladajo na wólby zwjazkoweho sejma a z tym zwisowacym wólbnym bojom žadaja sej iniciatorojo zesylnjenje wubědźowanjakmanosće. K tomu słuša mjenje poćežowanjow dawkow dla, mjenje běrokratije, wurunane socialne wotedawki, niše płaćizny za energiju a fleksibelnosć nastupajo dźěłowe prawo. Iniciatorojo maja nadźiju na lěpše wuměnjenja w mjezynarodnym wubědźowanju. Reprezentant BVMW Budyšin Wilfried Rosenberg sej wot wšitkich politiskich stronow žada, swoje dźěłowe ćežišćo na hospodarstwo wusměrić.