W Zhorjelskej tworni chcedźa w přichodźe dźěle tankow zhotowić
Zhorjelc (SN/BŠe). W Zhorjelcu chcedźa přichodnje dźěle za pancery město ćahow twarić. Z tym skónči so 175 lět stara tradicija na stejnišću. Brónjenski koncern KNDS přewza twornju Alstom a nowy kapitl w Zhorjelcu zahaji. Portfolijo wudźěłkow zawoda budźe so dospołnje změnjeć.
Wčera je zwjazkowy kancler Olaf Scholz (SPD) zhromadnje ze sakskim ministerskim prezidentom Michaelom Kretschmerom (CDU) do Zhorjelca přijěł. W jeju přitomnosći podpisachu zastupjerjo Alstom a KNDS wotpowědne dojednanje wo přewzaću twornje. Něhdźe 580 sobudźěłaćerjow drje budźe dohromady dale za KNDS abo Budyske stejnišćo Alstom dźěłać. Za zbytnych přistajenych chcedźa zamołwići fairne a socialnje znjesliwe rozrisanje nańć, koncern Alstom zdźěli.
