Budyska wokrjesna nalutowarnja towarstwa wuspěšnje podpěra

Budyšin (SN/BŠe). Towarstwa trjebaja stajnje zaso podpěru, zo móhli swoje projekty zwoprawdźić. Program Budyskeje wokrjesneje nalutowarnje pak jim mjeztym hižo šěsć lět zmóžnja pjenjezy w tak mjenowanym crowdfundingu zběrać. „Před šěsć lětami hišće nichtó dale njewědźeše, što crowdfunding je a kak to funguje. A nětko je region wo 500 000 eurow bohatši, přetož dźakowano platformje 99 škričkow (99 Funken) Budyskeje wokrjesneje nalutowarnje a wjace hač 3 600 podpěraćelam su so pjenjezy za powšitkownowužitne projekty nahromadźili“, nowinska rěčnica nalutowarnje Simone Bär wčera zdźěli. Njeje pak přeco jednore, projekt na platformje 99 škričkow nastajić, zajimawe stawizny powědać a ludźi wo tym přeswědčić, zo towaršnostny angažement jenož z pomocu mnohich podpěraćelow funguje. Ale móžno to je, a tuž wšeje prócy hódne. „Mamy telko wulkotnych a rozdźělnych wuspěšnych předewzaćow, kotrež směmy na našej platformje přewodźeć. Na naše towarstwa w regionje smy jara hordźi“, Simone Bär zwurazni.