Južny přibrjóh Slěborneho jězora chcedźa wot jutrow wotewrěć

Bjedrichecy (AK/SN). Slěborny jězor je saněrowanskich dźěłow dla zawrjeny. Tola nětko so něšto hiba, štož mnohich potrjechenych zwjesela. Wjesny předstejićer Złyčina, Bjedrichec a Mortkowa Udo Steglich zasadźuje so z Tinom Starostom a dalšimi wobydlerjemi při saněrowanju južneho přibrjoha Slěborneho jězora předewšěm hladajo na zachowanje přirody. „Dźakowano njemu móžachu tójšto brězow a chójnow při promenadźe wostać“, wjeselitaj so tež Burgfried Tannenhauer, kiž wobsedźi wot lěta 1991 korčmu „Waldschenke“, a Falk Nowotnick, kotryž wot lěta 2010 campingowy park wotnaja. Južny přibrjóh Slěborneho jězora wotewru po informaciji Łužiskeje a srjedźoněmskeje towaršnosće hórnistwoweho zarjadnistwa (LMBV) wot 18. apryla za nowu sezonu.