Po wuhlu zaso žito rosće

srjeda, 17. junija 2015 spisane wot:

Na płoninach, přez lětstotki wot hórnistwa wužiwanych, je móžno, w zhromadnym napinanju ratarjow a wědomostnikow zaso ratarsce wuspěšnje hospodarić. Fachowcy su překwapjeni.

Wot brunicoweho nasypnišća k płódnej roli, to bě tema njedawneho pólneho dnja koncerna Vattenfall na kromje Wjelčanskeje jamy.

Přez lětstotki hižo bjeru so łužiskim ratarjam a buram płódne pola wudobywanja brunicy dla. Na něhdyšich nasypnišćach pak w zhromadnym dźěle ratarjow, wědomostnikow a hórnikow zaso wužiwajomne ratarske płoniny nastawaju. Dźensniše wědomostne dopóznaća złožuja so na slědźenja, sahace hač do 60tych lět minjeneho lětstotka. Při tajkej płoninje na kromje Wjelčanskeje jamy zetkachu so nětko ratarjo, politikarjo, wědomostnicy a hórnicy k pólnemu dnjej, zo bychu sej nazhonjenja wuměnjeli. W srjedźišću zajima stejachu tajke ze sydomlětneho płodoslěda, złoženeho na wědomostne poručenja a ratarske nazhonjenja z wjele lubjacymi wuslědkami.

Do łužiskeje jězoriny zaměrnje inwestuja

póndźela, 15. junija 2015 spisane wot:

Kamjenc (AK/SN). Nowa pasažěrska łódź za łužisku jězorinu ma so hišće lětsa wo zwisk po wodźe mjez Braniborskej a Sakskej starać. To potwjerdźi jednaćel braniborskeho zaměroweho zwjazka Łužiska jězorina Volker Mielchen na njedawnym posedźenju w Kamjencu hladajo na bórzomnu liniju wot Złokomorowskeho hač do Lejnjanskeho jězora a wróćo. „Po tym zo je łódź dojěła budu ju wězo najprjedy raz na někotrych jězbach po Złokomorowskim jězorje wupruwować“, Mielchen rozjasni. Potom ma łódź wot něhdźe 25. junija turistow po wódnych pućach po jězorinje wozyć.

Dale derje wuwiwaja so mjeńše inwesticije w braniborskim dźělu jězoriny. Tak su při Kóšynskim a podłu Ilsyneho kanala informaciski a wodźenski system instalowali. Nastajichu přewažnje za kolesowarjow znamjenja a informaciske tafle­. W swójbnym parku při Złokomorowskim jězorje blisko Kóšyny (Groß­koschen) je hrajna zahroda nastała.

Znamjo pokuty

srjeda, 10. junija 2015 spisane wot:

Budyšin (SN). W Budyskim wopomnišću wobdźěla so wot minjeneje wutory dźewjeć abiturientow na akciji pod znamjenjom pokuty (Aktion Sühnezeichen).

Šulerjo gymnazija ewangelskeho šulskeho srjedźišća w Lipsku su hakle minjeny tydźeń poslednje abiturne pru­wowanja złožili. Nětko staraja so wo wonkowne ležownosće Budyskeho wopomnišća a pomhaja składy rumować a přerjadować. Nimo toho naprašuja so hosći a Budyšanow k wopomnišću. Ideju akcije w Budyšinje běchu Lipšćanscy gymnaziasća sami zrodźili. K zakónčenju šulskeho wukubłanja nochcychu jenož dźěła we wopomnišću podpěrać a čas bjez wučby do kónca šulskeho lěta přeprěčić, ale chcedźa so zdobom z Budyšinom a łužiskim krajom zeznajomić.

Budyske wopomnišćo zarjaduje lětsa prěni raz lětnje lěhwo akcije pod znamjenjom pokuty a je čestnohamtskim pomocnikam za to jara dźakowne. Lipšćanske ewangelske šulske srjedźišćo dobrowólny projekt koordinuje, a ewangelsko-lutherska wosada Budyšin-Strowotna studnja jón podpěruje. W rumnosćach wosady abiturienća derje přenocuja.

Atraktiwna móžnosć přenocowanja

wutora, 09. junija 2015 spisane wot:
Nowu atrakciju a zdobom dalšu přenocowansku móžnosć maja nětko we Wochozach blisko Bjerwałdskeho jězora. Doris Hußock a Dieter Ladusch staj tam sawnowej sudaj z Pólskeje stajiłoj a poskićataj jej za přebytk. Sudaj stej přijomnje wuhoto­wanej a skićitej dobre wuměnjenja. Tež wokoło njeju je wšitko na bjezstarostny dowol­ wusměrjene. Dowolowe sudy běštaj mějićelej zeznałoj při pólskim Baltiskim morju a so za tajkej tež we Łužicy rozsudźiłoj. Foto: Jost Schmidtchen

Dale mjenje bjezdźěłnych

wutora, 02. junija 2015 spisane wot:

Budyšin (SN). We wobłuku Budyskeje dźěłoweje agentury zličichu kónc meje 27 534 bjezdźěłnych žonow a muži. To su 1 803 (6,1 procent) mjenje hač kónc apryla. Přirunujo z lónšej meju je so 1 917 bjezdźěłnych mjenje pola agentury přizjewiło. „Porno předměsacej je so bjezdźěłnosć we wuchodnej Sakskej jasnje pomjeńšiła. Při tym spadny kwota tuž bjezdźěłnosće lětsa prěni raz hižo w róžowniku pod dźesać procentow“, rozjasnja předsyda jednaćelstwa Budyskeje agentury Thomas Berndt.

W běhu meje je so 1 987 wosobow, mjez nimi 807 žonow, na dźěłowej agenturje jako bjezdźěłne přizjewiło. Cyłkownje zregistrowachu we wobłuku Budyskeje agentury w meji 27 534 ludźi bjez dźěła. Sposrědkowarjo dźěła poskićeja tuchwilu 3 047 swobodnych městnow za prěnje dźěłowe wiki. Serwisej dźěło­da­warjow přizjewichu ze stron agentury 956 nowych swobodnych městnow. Přirunajo z aprylom je drje to 164 městnow mjenje, ale porno lońšej meji stej to 102 městnje wjace.

Wažne žórło inowacijow a idejow

pjatk, 22. meje 2015 spisane wot:

Budyšin (SN/JK). Wažna institucija hospodarskeho regiona wuchodneje Sakskeje, Technologiske a załožerske srjedźišćo (TGZ), wobsteji 20 lět. Składnostnje jubilejneho zarjadowanja hódnoćachu dźensa zastupnicy politiki, hospodarstwa a wědomosće dźěło zarjadnišća na dobro hospodarskeho wuwića Sakskeje.

Korektura budźe

pjatk, 22. meje 2015 spisane wot:

Berlin (SN/JK). Plany k zniženju wustorkowanja wuhlikoweho dioksida (CO2) z łužiskich milinarnjow so po móžnosći předźěłaja. To je wuslědk zetkanja načolnych politikarjow srjedu wječor w Berlinje. Po informacijach z knježerstwowych kruhow je hospodarski minister Sigmar Gabriel (SPD) wot zwjazkoweje kanclerki Angele Merkel (CDU) dóstał nadawk, nowy­ plan k zniženju wupuchow CO2 předpołožić. Po informacijach sćelaka MDR dźe při tym nimo dodźerženja klimoškitnych zaměrow wo zachowanje dźěłowych městnow we łužiskich milinarnjach a wuhlowych jamach.

Hospodarski minister Sigmar Gabriel budźe přichodne dny z hospodarskimi ministrami zwjazkowych krajow kaž tež dźěłarnistwami a zawodnymi radami wo móžnych změnach diskutować. Šef SPD je ke kompromisam a přilubjenjam zwólniwy.

Padnje rozsud?

srjeda, 20. meje 2015 spisane wot:

Budyšin/Berlin (SN/JK). Za dźensa wječor je kanclerka Angela Merkel (CDU) na brunicowy wjeršk do Berlina přeprosyła. Mjez druhim póńdźe wo hižo dlěje diskutowany popłatk za stare milinarnje w zwisku z němskimi klimoškitnymi zaměrami. Hač powjedźe wjeršk k nowym dopóznaćam a so hižo raz korigowane ličby hospodarskeho ministra Sigmara Gabriela (SPD) dale změnja, njeje wěste.

Dotalne ličby njejsu kmane, potrjechenych we Łužicy změrować. Łužiska wobwodna nawodnica dźěłarnistwa hórnistwo, chemija a energija Ute Liebsch widźi to takle:„Z nowymi namjetami njeje pokuta za stare milinarnje hišće z blida. Strach wo tysacy dźěłowych městnow w milinarnjach a jamach dale wobsteji.“ Podobnje posudźuje René Šuster, čłon braniborskeho brunicoweho wuběrka. „Redukowanje wupucha wuhlikoweho dioksida ma so na cyłu Němsku rozdźělić. Tohodla njeliču z tym, zo so milinarnje zrazom wšitke ze syće wozmu. Skerje dyrbjeli so potrjechene bloki poměrnje jedyn po druhim wotšaltować, štož by strukturnu změnu wolóžiło.“ Hač k tomu dźensa rozsud padnje?

Nowy poskitk

wutora, 19. meje 2015 spisane wot:
Berlin/Choćebuz (SN/JK). W rozestajenju z CDU/CSU a dźěłarnistwami wo popłatk za stare milinarnje ma hospodarski mi­nister Sigmar Gabriel (SPD) nowy poskitk. Po wčerawšich informacijach koalicije ma so wupuch wuhlikoweho dioksida (CO2) wuhlowych milinarnjow město wo dotal planowane 22 milionow tonow jenož wo 16 milionow tonow znižić. Diferenca móhła so zwoprawdźić ze sylnišim wu­twarom připrawow ke koplowanju energije a ćopłoty. Wažne knježerstwu je, zo hladajo na swětowy klimowy wjeršk kónc lěta planowane zalutowanje přidatnych 22 milionow tonow CO2 zwoprawdźa. Greenpeace, Zeleni a Lěwica wumjetuja Gabrielej, wohrozyć narodne klimowe zaměry, a žadaja sej, zo knježerstwo konsekwentnje a bjez kompromisow klimowe zaměry přesadźi. Tež kanclerka Angela Merkel (CDU) je po měnjenju opozicije ministra w naležnosći přesła­piła. Łužiske dźěłarnistwa, regionalni politikarjo a dźěławi energijoweho sektora najprjedy jónu wodychnu. Jim da nowa směrnica z Berlina wěstosć nastupajo eksisten­cu a łužiske dźěłowe wiki kaž tež w jednanjach z koncernom Vattenfall.

W Kukowje na Chróšćanskej dróze wabi nimojěduceho wulki, z mamutoweho štoma rězbarjeny worjoł k pozastaću. Nimo toho wuhladaš tam z kreatiwnymi idejemi wuhotowanu zahrodu z přirodnych twaršćiznow, přewažnje ze zornowca a z drjewa z domjacych lěsow. Wšo, štož tam nańdźeš a widźiš, je nastało po ideji 30lětneho Měrćina Krala, kiž tam ze swójbu z třomi dźěćimi bydli. Runočasnje pak je to wizitka młodeho muža z wušiknymaj rukomaj a z přewšo tworićelskimi idejemi, kotryž je so spočatk zašłeho měsaca zesamostatnił.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND