Šulerjo Serbskeje wyšeje šule Worklecy wčera w Berlinje mytowani
Berlin (SN/MiP). Z prěnim mytom nichtó z Worklečan Serbskeje wyšeje šule „Michał Hórnik“ ličił njebě – ani šulerjo, ani stawizniskej wučerce Diana Šołćina a Katrin Čornakec. Wšitcy běchu wčera popołdnju na mytowanske zarjadowanje do ministerstwa za wobchad a digitalne w Berlinje prošeni, dokelž su so z filmom „Móšeń w zapadźe – korjenje pak we Łužicy!“ na cyłoněmskim młodźinskim wubědźowanju pod hesłom „Časy přewróta“ wobdźělili. Čim wjetše běše wjeselo, jako přeprosy moderator Mirko Drotschmann – na socialnej platformje Youtube jako „MrWissen2go“ znaty – serbsku rjadownju jako prěnju z dohromady třoch dobyćerjow na jewišćo, zo by myto přijała. Myto – to je 3000 eurow hódny šek!