Budyšin/Drježdźany (SN/mb). Serbska rjadownja dotalneho třećeho lětnika Radworskeje zakładneje šule ma so zdźeržeć. Tole bě hižo jednohłósne žadanje Zwjazkoweho předsydstwa Domowiny na jeho posedźenju zašły pjatk. Na naprašowanje Serbskich Nowin pak je krajny zarjad za šulu a kubłanje (LaSuB) swoju poziciju wospjet wobkrućił. Rěčnik zarjada Clemens Arndt piše, zo steji „koncepcija 2plus w srjedźišću našeho jednanja, kotraž jara jasnje wjacerěčnosć spěchuje a bilingualny a bikulturelny charakter wučby wuzběhuje. Tworjenje rjadownje jeničce ze serbskimi šulerkami a šulerjemi njeby w zmysle tuteje koncepcije było.“ To woznamjenja, zo chce sej zarjad zjednoćenje šěsć serbskich a 19 němskich dźěći do jedneje rjadownje wunuzować.