Prózdninski camp RCW za serbske a serbšćinu wuknjace dźěći

Bórk (SN/CoR). „Mamy tule w Bórkowskim krajnym šulskim domje cyle idealne wuměnjenja za prózdninski camp, wosebje hladajo na to, zo je Budyšin ze swojimi serbskimi institucijemi w bliskosći“, je hłowna zamołwita prózdninskeho campa Rěčneho centruma WITAJ (RCW) Michaela Hrjehorjowa přeswědčena. Štyrnaće lět organizuje wona mjeztym tydźeń za dźěći serbskich šulow. Běchu tež hižo w Njebjelčicach a Njeswači­dle, ale dom w Bórku je so jako najlěpši wopokazał. „Wokolina ze spjatym jězorom a z bliskimi hrajkanišćemi skići wjele móžnosćow za pućowanja abo za to, so cyle prosće wonka pohibować.“