Wučba pod hołym njebjom słuži zrozumjenju wo wotběhach w přirodźe

Budyšin (SN/MiR). Dźěło w šulskej zahrodźe je kruty wobstatk wučbneho plana na sakskich zakładnych šulach. W předmjeće wěcna wučba ma za to kóždy lětnik nadawki. Sakske statne ministerstwo přewjeduje wubědźowanja za šule a za dźěćace dnjowe přebywanišća wo najrjeńšu zahrodu.

Na Chróšćanskej zakładnej šuli „Jurij Chěžka“ staraja so šulerjo wosebje wo zelenišća. Woni hladaja za tym, hač kwětki na rabatach wokoło kubłanišća derje rostu a kćěja. „Šulska zahroda je kruty wobstatk wučbneho plana. Tak hladamy na to, zo naši šulerjo tójšto wo tym zhonja, kak maja so rostliny plahować a hladać“, praji šulski nawoda Měrko Šmit.

„Pola nas su to šulerjo 3. lětnika, kotřiž so wo powyšene hrjadki (Hochbeet) w našim hrodowym parku staraja“, rozłožuje nawoda Zakładneje šule Bart Michael­ Biskop. Tuchwilu woni hrjadki přihotuja, prjedy hač za někotre dny symjo wusyja. „My tu zeleninu kaž tež zela plahujemy.“ Zo bychu čerstwe produkty tež jědli, wužiwaja na šuli cyło­dnjowski poskitk warjenja a pječenja.