Spěwarki a rejwarki na jendźelskej kupje přeswědčili

srjeda, 27. apryla 2016
artikl hódnoćić
(0 )
Delnjoserbski dźěćacy a młodźinski ansambl z Choćebuza je pod dirigatom Geralda Schöna a z klawěrnym přewodom Natalje Kowalčuk we Wulkej Britaniskej wjacore koncerty wuhotował.  Foto: Julia Meinhardt Delnjoserbski dźěćacy a młodźinski ansambl z Choćebuza je pod dirigatom Geralda Schöna a z klawěrnym přewodom Natalje Kowalčuk we Wulkej Britaniskej wjacore koncerty wuhotował. Foto: Julia Meinhardt
Kulturna wuměna mjez Łužicu a Wulkej Britaniskej běše poradźena.­ Čłonojo Choćebuskeho­ Delnjoserbskeho dźěćaceho a młodźinskeho ansambla su so z wopyta spěwneho ćělesa Southend Girls‘ and Boys‘ Choir w jendźelskim měsće Southend-on-Sea zaso nawróćili. Łužičenjo mějachu tam štyri wustupy z mnohimi zetkanjemi. Wopytujo zajimawostki w Southendźe, Cambrigdu, Londonje a Brentwoodźe zběrachu woni nazhonjenja. Wjerškaj běštej jara­ derje wopytany zhromadny koncert z partnerskim chórom w katolskej cyrkwi swjateho Jurja w Southendźe-on-Sea a zetkanje w katolskej šuli Brentwooda, hdźež wuknje tysac šulerkow a šulerjow z ćežišćom hudźba. Tež wopyt Londona, dołhe přechodźowanje podłu rěki Thames a jězba ze sławnym hoberskim kołom London Eye su wobdźělnikow wuprawy zahorili. Nic naposledk dožiwichu wšitcy krasne dny w hóstnych swójbach. Wažne tež bě, zo skedźbnjachu łužiscy wuměłcy na wšitkich stacijach z nazwučowanym jendźelskorěčnym­ materialom, z fotami a mnohimi rozjasnjenjemi na Serbow we Łužicy.
wozjewjene w: Kubłanje
Prošu přizjewće so, chceće-li komentar podać

Serbska debata

nowostki LND