Rjadowanja w hižo płaćiwym zakonju ma wšak za dosahace

Drježdźany (SN/MiR). Druhi naćisk k noweli šulskeho zakonja w Sakskej parlament tuchwilu rozjimuje. Mjez druhim su Rada za serbske naležnosće, Domowina a Serbske šulske towarstwo pokiwy zapodali. Namjety ze stron zastupjerjow Serbow so direktnje w noweli šulskeho zakonja njejewja. „Pawšalnje pak so tole tak rjec njehodźi“, piše na naprašowanje SN referentka sakskeho ministerstwa za kultus (SMK) dr. Susann Meerheim. „Wšelake pokiwy kultusowe ministerstwo w dalšim dźěle wobkedźbuje. Wone pak nimaja wuskutki na zakonski tekst noweho šulskeho zakonja.“ W noweli jewja­ so na přikład temy, kotrež su tež hižo­ w płaćiwym zakonju zakótwjene kaž koncept 2plus, planowanje budgeta, postajenje wo dźěle na serbskich a druhich šulach w němsko-serbskim sydlenskim rumje, inkluziwnje šulske kubłanje abo personalne wuhotowanje nastawaceho krajneho zarjada za šule a kubłanje.