Šulerjo zaběraja so z filmowym projektom
Rowno (AK/SN). Serbsko-němski medijowy camp zjednoća tuchwilu wosom wyšich šulerjow a gymnaziastow na statoku Hanza Njepile w Rownom. Tam zanurjeja so do žiwjenskeho swěta prěnjeho serbskeho ludoweho spisowaćela a połbura Hanza Njepile-Rowniskeho (1766–1856). „Zaměr projekta je, zestajeć scenisku dokumentaciju. Na kóncu ma nastać DVD. Film ma so tež na Youtube online stajić“, rozłožuje organizatorka projekta a koordinatorka Domowiny za serbske projekty w Slepjanskej gmejnje Juliana Kaulfürstowa. „Wuknjemy tu wšědnje dale serbsku rěč a přiswojamy sej samo stare wopřijeća“, praji šulerka Milena Pudec z Rulec młyna. Wot awgusta póńdźe wona do 6. lětnika Slepjanskeje wyšeje šule „Dr. Marja Grólmusec“. „Mamy w skupinje tež třoch maćernorěčnych šulerjow. Su to Malyn Wićaz a jeho sotra Wayan kaž tež Julian Tomašk z Budyšina. Z nimi móžemy stajnje serbsce rěčeć“, so Milena wjeseli.
