Za zwoprawdźenje koncepta 2plus pobrachuja pedagogojo

Budyšin (dpa/CoR). Sakska kubłanska agentura Budyšin (SBAB) nětko zjawnje přiznawa, štož bě Ludmila Budarjowa hižo w loni wušłej brošurce składnostnje 25lětneho wobstaća Serbskeho šulskeho towarstwa zwěsćiła: Wučerjo za zwoprawdźenje koncepta 2plus njedosahaja. „Móžemy zaběžace šulske lěto na serbskich šulach stoprocentnje zaručić. Dokelž pak njeje dosć maćernorěčnych wučerjow k dispoziciji, nastanu wulke dźěry w koncepće 2plus“, rozłožuje Angela Ruscher z SBAB. To potrjechi wosebje teamteaching dweju wučerjow za šulerjow z rozdźělnymi serbskorěčnymi kmanosćemi. Na 16 hornjołužiskich šulach wuwučuja tuchwilu nimale 4 000 šulerjow po koncepće 2plus.