W „Chróšćan kołću“ dźěłaja po nowym koncepće

Chrósćicy (SN/MiR). Z nowej koncepciju a z nowym mjenom do noweje pěstowarnje. To su sej kubłarki a kubłarjo Chróšćanskeho dźěćaceho dnjoweho přebywanišća „Při pastyrni“ a jeje nošer Serbske šulske towarstwo předewzali. 15 přistajenych tam SŠT ma, mjez druhim kubłarku z hojenskopedagogiskim wukubłanjom. Do kruha słuša tež dnjowa mać, kotraž stara so na Chróšćanskej farje wo pjeć dźěći hač do staroby třoch lět. Hortowe dźěći wostanu w swojim dotalnym domicilu.

Nowa pěstowarnja „Chróšćan kołć“ změje městno za hač do 75 dźěći wot žłobikoweje hač do předšulskeje staroby. „Chcemy wšitkim, wosebje serbskim dźěćom šansu skićić, tele naše nowe dźěćace dnjowe přebywanišćo wopytać“, wuswětla předsydka SŠT Ludmila Budarjowa, „pytamy tuž za pućemi, zo mamy za wšitkich zajimcow městno. Budźe-li trjeba, móhli dalšu dnjowu mać přistajić.“