W Njebjelčicach chcedźa na koncepće pěstowarnje dale dźěłać
Miłoćicy (SN/MiR). Křesćansko-socialny kubłanski skutk (CSB) prócuje so w swojich dnjowych zarjadnišćach dźěćom wobstajnje serbsku rěč posrědkować. W nošerstwje ma Miłočanski CSB šěsć pěstowarnjow a hort ze serbskorěčnym poskitkom. W pěstowarskim lěće 2016/2017 je štyri serbskorěčne kubłarki přistajił. Dwě skutkujetej w Pančicach-Kukowje, dalšej w Budyšinje. Dohromady je dźesać nowych kubłarkow w tym času pola CSB dźěłać započało. Kubłanske zarjadnišća maja so nuznje womłodźić. Wšako so w nich přiběrajcy wjelelětne kubłarki na wuměnk rozžohnuja. Tak je lětsa w awgusće jedna kubłarka swój dźěłowy čas zakónčiła, klětu w januaru podadźa so dalše tři na wuměnk.
