Gmejny maja kóšty za zastaranje z jězbnej biblioteku wotnětka same njesć
Budyšin/ Wulka Dubrawa (SN/MiR). Gmejny maja wot lětušeho wjace pjenjez za zaručenje poskitka knižneho busa nałožić. Jako přičinu zdźěli wčera Budyske měšćanske zarjadnistwo: „Rozsud wokrjesnych radźićelow so z financowanja jězbneje biblioteki wróćo sćahnyć a přichodnje jeničce stacionarne biblioteki spěchować potrjechi wšitke gmejny, kotrež su jězbnu knihownju sobu wužiwali.“
Biblioteki wudźeržować słuša do komunalnych nadawkow, njeje pak to za gmejnu winowatosć. Přiwšěm je za mnohich wjesnjanow Budyskeho starowokrjesa samozrozumliwe, zo móža sej knihi wupožčić, přewažnje w knižnym busu. To so tuchwilu měnja. Potrjechene wot postupowanja su Haslow a Prěčecy (gmejna Hodźij), Wulka Dubrawa, Klukš, Chwaćicy a Zdźěr (gmejna Wulka Dubrawa), Łahow a Łuh (gmejna Njeswačidło), Bóšicy, Łusč a Wětrow (gmejna Bóšicy), Wbohow (město Šěrachow-Korzym) a Wóspork, Hrodźišćo, Žarki a Worcyn (město Wóspork).
