Zetkanje na kubłanišću dopomnjenki a mysle do přichoda wuwabiło

Budyšin (SN/MiR). Bywši a nětčiši šulerjo Budyskeje Serbskeje fachoweje šule za socialnu pedagogiku woswjećichu wčera 25lětne wobstaće kubłanišća. Jako wonkowne znamjo za serbske kubłanišćo sadźichu na terenje Budyskeho powołanskošulskeho centruma (BSZ) za hospodarstwo a techniku, kotremuž je šula přirjadowana, młódnu lipu.

„Sadźimy lipu za serbsku fachowu šulu, dokelž je lipa štom Serbow“, zwurazni nawodnica socialneho wobłuka Elke Jäckel. „W minjenych 25 lětach smy w direktnym wukubłanju něhdźe sto serbskorěčnych kubłarjow a kubłarkow wukubłali. K tomu přińdu w zašłych dźesać lětach hišće něhdźe štyrcećo, kotřiž su powołanje po puću powołanje přewodźaceho wukubłanja nawuknyli“, rjekny wučer a fachowy poradźowar za socialnu pedagogiku dr. Hubertus Šenk.