Srědki za nawuknjenje serbšćiny su jara wšelakore

Budyšin (SN/MiR). Za přichodne šulske lěto 2017/2018 chce Rěčny centrum WITAJ­ zhromadnje z Ludowym nakładnistwom Domowina 31 wučbnicow a wučbnych srědkow wudać. Wjetšina produktow so dlěje, druhdy samo w běhu wjacorych lět za šulsku potrjebu přihotuje. Wjace hač třećina wšitkich wudaćow za přichadźace nowe šulske lěto, mjenujcy dwanaće, předleži w delnjoserbšćinje, tamne hornjoserbsce. Tež klětu budźe po dotalnym planowanju poměr mjez wudaćemi w rěčomaj podobny lětušemu. „Kóžde lěto znowa je nam wulke wužadanje, přihotować materialije za wšitke šule, w kotrychž serbšćinu wuwučuja. Wšako su žadanja na srědki dosć wulke. Knihi, dźěłowe zešiwki a dalše materialije maja dźensnišim žadanjam wučbneho plana, nowym metodam wuwučowanja a wězo wočakowanjam wučerjow a šulerjow wotpowědować. Wšitke přeća spjelnić pak njeje lochko a z tym je dźěło wšitkich wobdźělenych dosć naročne“, rjekny wotrjadnica za rěčne wuwiće a pedagogiku pola RCW Annett Dźědźikowa.