Rozmołwne koło je dopokazało, zo so zajimcy přeco witani nječuja
Budyšin (CK/SN). Přidružnicy za powołanje wučerja steja před wulkimi wužadanjemi. Tole bě dopóznaće wčerawšeho zarjadowanja w Budyskim běrowje Lěwicy. Zapósłanc Sakskeho krajneho sejma Hajko Kozel (Lěwica) kaž tež kubłanskopolitiska rěčnica frakcije Lěwicy a předsydka dźěłarnistwa wučerjow (GEW) w Lipsku Cornelia Falken chcyštaj zajimcow informować, kak móža so z přidružnikom-wučerjom w Sakskej stać. Třo běchu na zarjadowanje přišli. Žonje, kotrejž běštej za čas NDR na Budyskim Serbskim wučerskim wustawje studowałoj, dyrbještej kubłanišćo z přewrótom wopušćić – a to bjez zakónčenja studija. W lěće 2014 pak so jeju naprašowachu, hač nochcyłoj jako wučerce dźěłać. Swoje mjeno nochcetej w nowinje čitać a tež nic, hdźe tuchwilu skutkujetej. Spěšnje so w rozmołwje wukopa, čehodla. Byrnjež nawodnicy zakładneju šulow wučerce podpěrałoj, měještej wobě na kubłanskej agenturje a druhich zarjadnišćach zaćišć, zo njejstej witanej.
